Tēnā tātou kei aku rangatira,
Ko te wiki tuatahi tēnei o ngā hararei (mō ngā tamariki!!!), ā, ka mau ki taku hirikapo te whakataukī nei, nā reira ānei taku rangitaki o te wā, me taku ui makihoi!!!!!
He aha hoki te pūtake o te whakataukī nei?
Kei roto hoki te whakataukī nei i te tūtohinga o Te Aho Matua.
Tamariki wāwahi tahā, aratakina ki te mātāpuna o te mōhio, o te ora, o te maungarongo e!
Ānei tētahi whakaahua o te puna waiora kei Te Tau Ihu o Te Waka a Māui, kei Onetāhua, arā, ko Waikoropūpū te ingoa o te puna nei.
Ki au, kōia nei tētahi tauira o te mātāpuna.....
He mātāpuna o te MŌHIO......
He mātāpuna o te ORA......
He mātāpuna o te MAUNGARONGO.....
Nā reira, ki te wāwahi tahā te tamaiti,
He whakaahua o tētahi tahā.
me arahi i te tamaiti ki te mātāpuna e rite ana tōna ora, tōna mōhio me tōna maungarongo ki te puna o Waikoropūpū. Kātahi, ka rongo te tamaiti ki tōna rangatiratanga, ki tōna ihomatua, ki tōna mana motuhake, ā, ki tōna mauri tau.
Ko te kāinga te mātāpuna tuatahi o ā tātou nei tamariki, he mōhiotanga tō te kāinga, he oranga hoki tō te kāinga, ā, ko te maungarongo tōna rongopai. I au e whakaaro ana ki tēnei mātāpuna, ka toko ake te whakataukī tuarua, 'Tamaiti ākona ki te kāinga, tūngia ki te marae e tau ana'.
Ko tētahi o ōku marae tēnei, ko Te Mana o Turanga te wharenui, ko Whakatō te ingoa o te marae.
Ko te marae tētahi tauira o te mātāpuna, he wāhi e ora ana, he mōhiotanga hoki tō te wāhi nei, ā, ko te maungarongo hoki tētahi āhuatanga motuhake o te marae.
Ko te kura kaupapa māori o Te Kura Whakapūmau I Te Reo Tūturu ki Waitaha.
Ko te kura tētahi tauira anō o te mātāpuna, he tai ao ako, he tai ao whai wheako anō hoki.
E aratakina ana te tamaiti e te kura ki te whai mōhiotanga, ki te rapu mōhiotanga, ā, kia whai maramatanga mai i aua mōhiotanga.
E aratakina ana te tamaiti e te kura ki te whai oranga, whai oranga ā hinengaro, ā wairua, ā tinana.
He tai ao e karapoti ana e te ora. He wāhi haumaru, he wāhi harikoa, he wāhi e toutou ana i te ahi kā o te tamaiti.
E aratakina ana te tamaiti e te kura ki te maungarongo, ko te noho tau, te mauri tau, te tū mana māori, te tū humarie.
Me pēnei pea te kōrero! Ko te kura te wāhi ka whakatinanahia ngā wheako me ngā akoranga mai i te kāinga, te marae me te tai ao whānui, ā, ka whakawhaiti mai ko ērā wheako katoa ki te horopaki o te kura. He tū momo 'parakatihi', he tū momo wānanga, he tū momo whakamatautau.
Nā reira, ki te wāwahi tahā a tātou nei tamarik, me ū tonu tātou,
aratakina......aratakina......aratakina.....
ki hea....????
ki te MŌHIO
ki te ORA
ki te MAUNGARONGO E......
E hangai ēnei kōrero o taku rangitaki ki ngā paearu o Te Aho Matua me Ngā Paearu o te Pouako Rēhita.
Te Aho Matua - Te Ira Tangata (1.2), Ngā Iwi (3.1) Āhuatanga Ako (5.10),
PTC - 8, 9, 11